26 тамыз күні сағат 05:58-де Түлкібас ауданындағы Машат ауылынан 4 шақырым жерде, «Алматы-Ташкент-Термез» республикалық маңызы бар күре жолында ірі көлік апаты болды, деп хабарлайды Azatmedia.kz Otyrar.kz сайтына сілтеме жасап.
«Алматы-Сарыағаш» бағытымен келе жатқан «Yutong» маркалы жолаушылар автобусының жүргізушісі көлікті басқара алмай, жолдың жиегіне шығып, жанымен құлаған. Автобус салонында 34 адам, соның ішінде жеті бала болған.
Көлік жанармайы төгілген жоқ. Жол-көлік апаты салдарынан, сағат 07:35-тегі жағдай бойынша, Сайрам ауданының орталық аудандық ауруханасына 17 адам жеткізілді, соның ішінде 6 адам ауруханаға жатқызылды, соның ішінде екеуі – ауыр жағдайда, арасында балалар жоқ. Қалғандары тексерілген соң, үйлеріне жіберілді. Қаза тапқандар жоқ.
Оқиға орнына ТЖД, полиция және жедел медициналық жәрдем бригадасының қызметкерлері барды.
